البنت لما تكبر

من أفضل ما قدمته لنا وسائل التواصل الاجتماعى أنها فتحت لنا أفقاً كى نقرأ بعضنا ونفهم أكثر عن أنفسنا. وأصبحت فضفضة السوشيال ميديا أفقاً مفتوحاً ومعيناً واسعاً من المشاعر والأحاسيس والدروس المستفادة من التجارب. ومن الأمثلة المتميزة ما كتبته سالى سليمان على الفيس بوك بعنوان: أنا كبرت بجد..!؟

تقول:

ده انا اتعلمت ماقولش اللى انا حاساه..

كبرت وبقيت اسمع أكتر ما بتكلم..

كبرت وبقيت أرد فى سرى بكلام كتير وما انطقش بولا كلمة..

كبرت وبقيت اعرف اقول نكت فى عز ما انا لسه مخلّصة عياط ومحدش بيعرف كده غيرى..

كبرت وبقيت أكبّر دماغى من التفاصيل واقول لاصحابها: تمام، تمام، حصل خير..

كبرت واتعلمت اسيب إيد اللى عايز يمشى من غير عياط..

كبرت وبقيت اجيب المشكلة فيّا بدل ما اقول كلام هيظلم اللى حقيقى جوايا ومش هيكفيه..

كبرت وعرفت قيمة نفسى من غير ما حد يوصفهالى..

كبرت وعرفت إن الحب المثالى فى الأفلام والأغانى القديمة..

كبرت ومابقيتش أحط كلمة «بيحبنى قوى» ضمن المميزات.. عشان أنا أستاهل اتحب..

كبرت وبقيت اعرف ألهى نفسى واقوّيها من عمل أى مكالمة وحشنى صوت أصحابها اللى مايعرفوش التقدير..

كبرت وبقيت اسامح أى حد هيجيب لى وجع الدماغ..

كبرت ومابقيتش ازعل لما اتشتم من حد جت سيرتى قدامه..

كبرت وبطلت افكّر الناس هتقول إيه عنى واجرى ادوّر على رضاهم..

كبرت وبقيت افرّق بين الناصح والشامت..

كبرت واتعلمت ابيّن إنى مستمتعة جداً بدور الصديقة المقربة وانا عارفة نوايا أصحابها تمام..

كبرت ومابقيتش ازعل من صحابى امّا ينسونى، وبقيت انا العاقلة الوحيدة اللى بيجروا هما عليها «وقت اللزوم»..

كبرت واتعلمت إن الاستغباء ذكاء بيعرّفنى بسهولة معدن الممثلين حواليا..

كبرت واتعلمت إن محدش فيها باقى ومفيش حال بيدوم..

كبرت وعرفت إن الاهل والقرش هما السند الفعلى مش الراجل ولا الصحاب..

كبرت وبقيت اشتغل على نفسى لحد ما بقيت انا الواسطة..

كبرت واطمّنت إن رزقى جاى جاى ومفيش داعى اتوتر..

كبرت وبقيت اتونّس بوحدتى أكتر من الناس، لأ وبنزل افسّحنى..

كبرت وبقيت اشترى حاجتى بنفسى ماباخدش حد معايا..

كبرت وبقيت ما نامش قبل ماخد حقى من أى حد بيحاول يتعدى عليا فى الشارع بالكلمة ولا بالنظرة ولا حتى بالكلاكس وبقدر ادخل الاقسام وبعمل محاضر حتى لو هتترمى فى الدرج..

كبرت واكتفيت بحواديت الناس اللى بتأكد لى إنى فى غنى عنهم وإن الوحدة أهدى وأرقى بكتير..

كبرت وبقوا يحسدونى على سفرى لوحدى وحريتى اللى لا بتأذى ولا بتسمح لحد يأذيها..

كبرت وبقيت اقرا الناس من عينيهم بشكل واضح قوى يا #أمى بسبب دُعاكى الكتير، بس يا ريتك فهمتينى إن الفهم الزايد صادم لصاحبه أولاً وإن الواقع غير..

#سالى_سليمان

#أنا_كبرت_بجد؟!