تكليفات الرئيس!

هذه قصة متداولة بطلها الرئيس السادات ووزير الزراعة سيد مرعى.. القصة كاشفة ودالة.. يحكى أن سعر اللحمة ارتفع كما حدث فى هذه الأيام.. ولما وصلت قيمته جنيها، غضب الناس وخرجت المظاهرات تهتف: سيد مرعى يا سيد بيه كيلو اللحمة بقى بجنيه!

يقال إن الرئيس السادات كلف وزير الزراعة بعمل مزرعة تسمين عجول فى الفيوم، حتى يضرب جشع التجار ويطرح الإنتاج فى السوق.. وبعد فترة، الرئيس السادات سأل الوزير: أخبار مزرعة الفيوم إيه يا سيد؟!.

رد الوزير وقال تمام التمام، جاهزة على الافتتاح يا فندم!.. فقال له السادات: طيب بكرة ١٠ الصبح نفتتحها!.. والغريب أنه لم تكن هناك مزرعة ولا عجول!.. وهنا تغير وجه الوزير لأنه اضطر يقول للرئيس: المزرعة جاهزة مع أنها غير موجودة على الإطلاق، وذهب رجاله يبحثون عن عجول ومزرعة وتجهيزها للافتتاح!.

أخبار متعلقة
no image
ذكريات من الوفد!
no image
جزيرة إبستين!
no image
سمعة البرلمان!
المهم، السادات توجه فى اليوم التالى إلى الفيوم، ولما وصل المزرعة كان شكلها يفرح وفيها كل أنواع العجول، لكن بعد أن انتهت الزيارة أخذ وزير الزراعة على جنب وسأله: أجرت الجاموسة بكام يا سيد؟.

قشعر الوزير بالصدمة وعرف أن الرئيس كشفه فرد: بعشرة جنيه يا ريس!.. السادات قاله: مش كتير عشرة جنيه على ١٢ ساعة تأجير؟!.

ولما سأله: عرفت منين يا ريس إن الجواميس متأجرة؟.. رد وقال له: أنا فلاح.. ولما دخلت على البهايم الزريبة وجدتها هايجة ومش على بعضها.. والحالة دى بتحصل لما الجاموس ميكنش فى زريبته!.

ولكن بعدها تم عمل مزرعة التسمين، لكن الوضع الاقتصادى كان سيئا، فأسعار اللحمة غليت والكيلو وصل لجنيه!.. والناس خرجت فى مظاهرات تهتف «سيد مرعى يا سيد بيه كليو اللحمة بقى بجنيه».

وكان وقتها سيد مرعى رئيس مجلس الشعب الذى أصدر قرارات بزيادة أسعار بعض السلع!.

الرئيس السادات لما وجد الناس غضبانة ألغى قرارات رفع الأسعار رغم أنها كانت قروشا قليلة!.

وهنا السادات دعا إلى اجتماع مع الحكومة ليناقشوا الموضوع ويبحثوا الحلول للأزمة!.

يقول النبوى إسماعيل، وزير الداخلية، وكان حاضرا الاجتماع:

الرئيس السادات كان غاضبا ومنفعلا جدا وقال: «مينفعش نسكت على أزمة اللحمة.. إحنا لو سكتنا الكليو هيوصل لخمسة جنيه.. ووقتها الكيلو كان بتلاتة جنيه.. والناس على الآخر بعد ما كان بـ٦٨ قرشا ثم وصل لجنيه!».

كل واحد من المسؤولين بدأ يعرض مقترحه لحل الأزمة.. لكن الرئيس السادات قال لهم: لا لا.. الكلام ده مش هيجيب نتيجة.. إحنا هنلغى اللحمة شهر عشان نمنع الاستغلال ونوقف ارتفاع الأسعار!.

وكلف وزارتى الداخلية والتموين بتنفيذ القرار، وفعلا تم منع الذبح لمدة شهر كامل، وتم تطبيق القرار فى كل المحافظات، والرئيس السادات طلب من المصريين أن يقاطعوا اللحمة تماما خلال الشهر!.