كل قرد يلزم شجرته (3)

 - عم صيام: لا مؤاخذة يا عمنا.. مسافة ما أخطف التراويح.

- صاحب المحل: اركن بعيد!.. شوف لك أى حتة بعيد عن المحل!.

- عم صيام: أنا راكن قدام المحل مش جواه.

- صاحب المحل: انت عاوز تسد عليّا باب الرزق؟!.

- صاحب محل آخر (يظهر فجأة): اركن بعيد يا جدع انت.. وعدى ليلتك.

- عم صيام (بعصبية): بقول لكم إيه.. كل قرد يلزم شجرته.. انتوا فاكرنى هخاف منكم!.

- صاحب محل ثان (باستنفار): كل قرد يلزم شجرته؟!.. ورحمة أمى لأدخلك جوه القفص.. خش جوه عربيتك من سكات وامشى من هنا.

- عم صيام (بانسحاب): قلبك أبيض.. أنا ما أقصدش.. دى كلمة خايبة كده سمعتها م الواد ابنى.. مش عارف إيه اللى جابها على بالى دلوقتى.. أنا معنديش مشكلة أمشى.. بس يرضيكم تفوتنى التراويح؟!.. ده انتو المفروض تقفلوا وقت الصلاة.

- صاحب المحل الأول: نقفل عشان جنابك تسد الشارع براحتك.. وتوقف حال اللى رايح واللى جاى.. روّح العربية دى وامشى على رجليك.

- عم صيام: قلت لمراتى كده.. كل خطوة بتشيل سيئة وبتحط فى الجيب حسنة.. قالت لى لأ خد العربية.. عشان تجيب السحور وانت راجع.. ههههه.. ما انتو عارفين الستات!.

- صاحب المحل الأول: انت هتحكيلى قصة حياتك.. اسحب العربية من هنا وامشى.. وقفت حالنا الله يوقف حالك.

- عم صيام: أنا حاسس إنك مكتوم شوية.. تقريباً مش سالك.. إيه رأيك ندخل كلنا كده بالصلاة ع النبى نصلى التراويح وندعى ربنا مع الشيخ رضوان إنه يسلك حالنا؟.. انتو ما تعرفوش الدُعا ممكن يسلكها معاكو إزاى.

- صاحب المحل الثانى (بتنمر): اشترى نفسك واخلع من هنا.. أنا عفاريت الدنيا بتتنطط قدامى.

- عم صيام (مبتسماً): مش مصدقك طبعاً.. يا عمنا العفاريت بتخفى فى رمضان.. ما هو لو تدخل معايا للشيخ رضوان هتعرف كل حاجة.. ربنا بيكتف الشياطين فى الشهر الكريم.

- صاحب المحل الأول (ساخراً): عشان اللى زيك بيقوموا بالواجب.. (وهو يمسكه من يده ويشير إلى الشارع): شايف العالم اللى مرصوصة ع الأرض بره الجامع.. قل لى بقى هتصلى فين؟!.

- عم صيام: أنا جاهز.. ما بمشيش من غيرها فى رمضان.. ثانية واحدة.. (يلتقط سجادة صلاة من السيارة): سجادة الصلاة أهه.. أنا هفرش قدامك وأصلى عشان تحل البركة ع المحل.

- صاحب المحل الأول (وهو يمسك بخناقه): واضح إن الذوق مش نافع معاك.

- عم صيام (إلى من حوله): معقولة كده يا جماعة.. انتو هتسيبوه يعتدى عليّا وأنا جاى أصلى.. (وهو ينظر إلى المسجد الذى يصدر عنه صوت الشيخ رضوان): سيبنى أدخل.. الشيخ رضوان قرب يدعى!.. اتكلموا يا جماعة.

- صاحب المحل التانى (وهو يفض الاشتباك): سيبه يا حسين.. خش صلى براحتك.

- عم صيام: يا سلام.. هى دى أخلاق رمضان.

- صاحب المحل الأول: أسيبه إزاى؟.. لازم يسحب عربيته من هنا.

- صاحب المحل الثانى: سيبه وأنا هعالجه.. خش صلى براحتك.. بس ورحمة أمى لأعلم عليك فى الحتة اللى هتوجعك!.. ادخل صلى.. وأنا هخرتقلك العربية.. همسمرها لك فى كل حتة.

- عم صيام (بانزعاج وغضب): انت فاكرها سايبة.. بقول لكم إيه.. كل قرد يلزم شجرته.

- صاحب المحل الثانى: بتكررها.. طيب وحياة.......

- عم صيام: انت سمعتها إزاى.. أنا قصدى إن أنا كقرد هلزم شجرتى.. انت مش قلت لى من شوية «هدخلك القفص».. أدينى داخل برجليّا.

نقلا عن الوطن القاهرية
المقال يعبّر عن رأي الكاتب وليس بالضرورة رأي الموقع