الوطنى الحقيقى..!

- ابن وقته: وماله لما شركة ولّا كان مين كان يصرف على سفر حبايبنا الفنانين والإعلاميين علشان يشجّعوا منتخبنا فى روسيا؟!.. وطنيين حقيقيين.. مالكم ومالهم؟!.

- عزت: اللى أعرفه إن اللى عاوز يشجع بلده يشجعها من جيبه.. تقدر تقول لى كام واحد من دول مسدد الضرايب اللى عليه؟.. بيقبضوا ملايين قد كده.. ومش حاسين بالناس.

- ابن وقته: بطّلوا نفسنة عَ الأغنيا.. هو اللى انتوا فيه ده من شوية.

- عزت (ضاحكاً): لأ من شويتين!.

- ابن وقته: بتتريق يا عزت؟!.. ما هو لو كنت وطنى حقيقى ماكنتش تعمل كده.

- عزت: فقعت مرارتى بالوطنى الحقيقى.. الوطنى الحقيقى اللى يدى للبلد دى.. مش اللى يلهف منها.

- ابن وقته (ساخراً): أيوه.. وسمّعنى سلام «مانقولش إيه إدتنا مصر.. نقول هندى إيه لمصر».. غلط مطرطش.. اللى يدى مايبقاش وطنى حقيقى.. الوطنى الحقيقى هو اللى وطنه يصرف عليه.. مش اللى يصرف من جيبه.. لازم الوطن يكون عنده نظر وهو بيتعامل مع نجومه وحلوياته اللى بتقوم بمهمة وطنية.. تشجيع المنتخب مهمة وطنية.. فاهم يا مواطن؟.

- عزت: لو على كده الشعب كله هيطلع على روسيا يشارك فى المهمة الوطنية.

- ابن وقته: ده لو وطنيين حقيقيين.. مش عالم واطية قعدوا يبصوا للنواب الغلابة فى سفريتهم علشان يشجعوا مصر لحد ما فكّسوا لهم الطلعة الجوية على روسيا.. وقاعدين يقروا دلوقتى عَ الفنانين والإعلاميين اللى هيرقصوا مع فريقنا فى المونديال.

- عزت: سيبك م الكلام اللى يحرق الدم ده.. وقل لى انت بتتفرج على ماتشات كاس العالم فين؟!.

- ابن وقته: فى البيت طبعاً.

- عزت (مندهشاً): انت مشترك فى القناة اللى بتذيع الماتشات؟!.

- ابن وقته: لأ طبعاً.. أنا وطنى حقيقى.. مش زى المجانين اللى دفعوا لقطر اللى مابيجيش من ناحيتها غير الإرهاب.

- عزت: آه!.. بتتفرج عَ الماتشات اللى بتذيعها القناة المفتوحة وبس.

- ابن وقته: أنا وطنى حقيقى.. بتفرج عَ المفتوح والمتشفر.

- عزت: يبقى عن النت.

- ابن وقته: مش أنا الوطنى اللى يسلم نفسه للنت فى موقف زى ده.

- عزت: حيرتنى معاك.. هتتفرج فى البيت إزاى؟.

- ابن وقته: التلم له نُص البلد.. جارى اللى ساكن فوقيّا م المجانين اللى اشتركوا فى القنوات إياها.. استلمته وقعدت أقول له الواد طارق بيزن عليّا.. ومراتى حلفت عليّا بالطلاق بسبب ماتشات كاس العالم.. واترجّيته يدينى وصلة.

- عزت: واداها لك؟!.

- ابن وقته: كان معصلج فى الأول.. مراته الواطية قالت له لأ.. فضلت وراه لحد ما قال لها لأ.. هادى لـ«ابن وقته» أخويا وصلة.. التلامة كنز لا يفنى.

- عزت (بضجر): ماكانش له لازمة كل ده.. سعادتك راجل مليان.. تقدر تشترك وتتفرج براحتك.

- ابن وقته: عاوزنى أتفرج على حسابى زى الواطيين دول.

- عزت: وليه لأ؟!.

- ابن وقته: ليه لأ؟!.. علشان أنا وطنى حقيقى يا واطى.

نقلا عن الوطن القاهرية

المقال يعبّر عن رأي الكاتب وليس بالضرورة رأي الموقع