في صحتك!

من أغرب التهانى التى نشرتها الصحف تهنئة رئيس الوزراء الإسرائيلى، نتنياهو، للرئيس الأمريكى ترامب، بشأن اغتيال أبوبكر البغدادى.. لا أعرف إن كانت تهنئة على التخلص من البغدادى، أم أنها تهنئة مبكرة على الفوز الثانى برئاسة أمريكا؟.. أم لأنهما «دافنينه سوا»؟.. إليكم الحوار:

■ لازم نعترف إنها ضربة معلم.. مستر بريزيدنت!

- شكراً يا «بيبى» البركة فيك.. دماغك اللى ألماظ!

■ لأ، التوقيت كمان يفرق.. أوباما عملها مع بن لادن(!)

- اسكت يا «بيبى».. بفكر نعملها فيلم سينمائى يكسر الدنيا!

■ والله فكرة.. منها تسويق لأمريكا ولترامب وللجيش!

- كمان هوليوود تشتغل بقى.. وكلام عن القدرة الأمريكية!

■ سؤال «شرير»: بس هنعمل إيه بعد كده؟!

- بسيطة، نعمل جلسة مع الموساد ونطلع بحاجة!

■ أيوه.. إحنا مش هنسيبهم كده.. لازم الاشتغالة!

- باقولك.. لازم هدنة، نتكلم عن الاستقرار فى العالم!

■ (لا لا لا) انت بقيت «جن سياسة» مستر ترامب!

- متنساش إنى بتاع بيزنس «بيبى».. خليك فاكر!

■ لأ ده انت ظاهرة.. الغريب إنهم بيصدقوك!

- بيبى.. أنا مش قارفنى إلا الإعلام الأمريكى!

■ كل حاجة سهلة.. كلمتين حلوين ونعدى الأزمة وخلاص!

- (لا لا لا) أنا كفاية عليا تويتر.. مش عاوز صحافة أبداً!

■ مينفعش مستر بريزيدنت.. إحنا داخلين انتخابات ولازم تنجح!

- مفيش كلام.. عملية البغدادى دى عملت شعبية جامدة جداً!

■ انت لازم تنجح.. قدامنا القدس، وخريطة الشرق الأوسط!

- ليه لازم أنجح؟.. أى حد تانى يعملها أحسن منى!

■ (بلهجة حاسمة) ترامب.. انت اللى هتغنى يا منعم!

- خلاص شدوا حيلكم بقى معايا.. المعركة مع الكونجرس!

■ كل شىء يتحل.. وأنت رئيس «ظاهرة» إحنا محتاجينه!

- إحنا مقصرناش أبداً.. كوشنر عارف كل حاجة!

■ المهم خلينا نحتفل دلوقتى بالبغدادى، الليلة خمر!

- (يرفع الكأس) فى صحتك.. ماى بيبى!

■ (يرفع الكأس) فى صحتك مستر بريزيدنت!

- عقبال الرئاسة.. المهمة المرة دى أصعب!

■ بالعكس.. الشعب عاوزك، واحنا عاوزينك!

- دى عاوزه حملة إعلامية رهيبة!

■ واحنا جاهزين.. (فى صحتك)!