مصر على القهوة!

«ازرع كل الأرض قهاوى».. تحت كل عمارة قهوة بعلم الحى.. طبعًا ليست مرخصة ولا تدفع ضريبة.. كأنه اتفاق غير مكتوب على التشغيل مقابل دفع المعلوم شهريًا.. عندما تتحرك الحملة سيخبرك أحدهم.. هذا التليفون بألف جنيه وفوقه بوسة.. أصبحت القهوة هى المحل المختار.. فإلى الحوار:

- إيه رأيك نفتح قهوة؟!

- يا راجل وإحنا نقدر على الحى والمحافظة!

- يا سيدى احرس قصب بقصب، وريح دماغك!

- طب والخناقات والبهدلة، وقلة القيمة؟!

- نعملها سياحية وكده هيجيلها زبون معين!

- طب قول نفتح مطعم معلش!

- يعنى الصحة هتسيبك؟.. أكل العيش مر!.

■ ■ ■

- الله.. انت بتتكلم بجد ولا إيه؟!

- وليه لأ؟.. إحنا بندفع يوميًا شىء وشوية!

- على رأيك دى بقت المحل المختار دلوقتى!

- هى النشاط الوحيد اللى شغال فى مصر!

- بس.. خايف صدقنى!

- يعنى عاجبك قعدة المعاش المبكر دى!

-هو أنا قعدت بمزاجى.. إنت شايف بنفسك!

-(نَفَس عميق) خلاص نعمل فضائية.. ههههه.

■ ■ ■

- تعرف إنك فتحت الجراح.. كنت قاعد وناسى!

- ناسى ايه؟.. ناسى إنك بلا عمل.. إنك خالى وظيفة!

- فعلًا.. كنت ملء السمع والبصر. دلوقتى قاعد ع القهوة!

- يا عم انفخ وشيش.. وحياتك هتفرج!

- منين؟.. كل السوق انضرب.. مفيش بديل!

- ضاقت فلما استحكمت.. (هاهاهاها)!

- والنبى بلاش تخدير.. والله كده غلط كبير!

- غلط إيه؟.. هو حد عاوزك أصلًا!

- ينفع عقول مصر تقعد على قهوة.. ينفع بذمتك؟!.

■ ■ ■

- هوه إيه؟.. يعنى يا تشتغل صحفى يا بلاش؟!

- أومال أشتغل إيه بعد ربع قرن صحافة؟!

- اشتغل سباك يا سيدى.. هتاكل جاتوه.. قلت إيه؟!.