قال المُلاك

تلقيت رسائل كثيرة من ملاك بيوت وعقارات قديمة أشارت إلى ظلم حقيقى واقع عليهم منذ عقود، رغم وجاهة بعض المبررات التى ذكرتها رسائل المستأجرين.

وقد اخترت هذه الرسالة التى كتبتها السيدة الفاضلة عفاف سلام، واتسمت بالاتزان والنزاهة، لأنها اتفقت مع الرأى الذى يتبناه كل أصحاب الضمائر الحية، وهو عدم طرد المستأجرين تحت أى ظرف.

وقد جاء فى رسالتها:

د. عمرو، نظرًا لأن حضرتك مهتم بموضوع الإيجار القديم، أحب أقول إنى مالكة لعقار ورثناه عن والدنا، مكوَّن من ٤٨ شقة، وإحنا ستة أفراد ورثة، والعقار دخله ٩٠٠ جنيه كل شهر، يعنى كل فرد نصيبه ١٥٠ جنيه فى الشهر، وده طبعًا فى ظروف الغلاء الحالية لا شىء.

أحب أقول لحضرتك إن عندنا فى العمارة الشقة ٤ مكوَّنة من ٤ غرف كبار وريسبشن و٢ حمام بـ١٤ جنيه فى الشهر، والـ٢ غرفة بـ١٠ جنيه فى الشهر، وأنا على شارع رمسيس العمومى، يعنى فى منطقة متميزة، حتى لو زودوا ٢٠ ضعف، يعنى ٢٠٠ و٣٠٠ جنيه، برضه قليل، والحقيقة بدل ما يهاجموا الملاك ويقولوا لهم «ارحمونا وإياكم» ورفع الإيجار، يا ريت يقولوا للدولة ترحمنا وتنزل أسعار المعيشة، لأن إحنا كمان بشر وعايزين نعيش حياة كريمة.

أنا وإخوتى أعمارنا ما بين منتصف الستين وفوق السبعين، يعنى كبار فى السن، والحقيقة أنا مستفزة جدًا من الذين يتكلمون فى «التوك شو» ويقولوا: «كثير وحرام يدفع المستأجر ١٠٠٠ جنيه حد أدنى»، وإحنا كنموذج كلنا على المعاش وأصحاب مرض، حنجيب منين؟ وليه بيقولوا حرام للمستأجر فقط ومش أيضًا للملاك؟ فنحن نعانى من غلاء العلاج والأدوية والأكل والشرب والكهرباء والغاز والعيشة، وناس كثيرة تعرف تدفع هذه المستلزمات كويس ويتحملوها، وبيجوا عند الإيجار ويقولوا: «مش حنقدر» ونرفض أى زيادة، أو يقبلوا بزيادة زهيدة.

عفوًا، نسيت أقول لحضرتك إن عندنا سكان قافلين شققهم وقاعدين فى فيلات وشقق فخمة ملكهم، ومعتمدين إنهم بيدفعوا ملاليم، ده الست اللى بتنضف لى البيت ساكنة فى منطقة شعبية فى حجرتين وتدفع ٥٠٠ جنيه فى الشهر، والسكان اللى عندى كلهم مرتاحين ماديًا وأصحاب أعمال، ودخلهم كويس جدًا، ربنا يزيدهم، ويرجعوا يقولوا: «حرام مش قادرين».

وفى النهاية، أحب أقول إحنا عندنا سكان ممكن كنا نطلعهم من الشقق من زمان، لأنهم ساكنين بدل إخوتهم، بس إحنا عندنا رحمة وسايبينهم ساكنين، وعمرنا ما فكرنا نطردهم، وإحنا كمان مع حضرتك ضد طرد السكان، بس لازم زيادة الإيجار تكون عادلة عشان كمان إحنا نعرف نعيش فى هذا الغلاء.

جوهر ما قالته السيدة عفاف جدير بالاحترام، لأنها نظرت للموضوع بصورة مصلحة الجميع، وليس مصلحتها كمالكة فقط، ويبقى الاتفاق على القيمة الإيجارية العادلة هو التحدى الحقيقى مادمنا اتفقنا على عدم طرد المستأجر.