بدرية طلبة تعلن مساندتها لأي قرار يتخذه الرئيس السيسي

علقت الفنانة بدرية طلبة، على أزمة رفع أسعار البنزين والتي أقرتها الحكومة، الخميس الماضي، مشددة على مساندتها للرئيس عبدالفتاح السيسي، في أي قرارات يتخذها، وكتبت عبر حسابها على موقع التواصل الاجتماعي "فيسبوك"، قائلة "ردًا على الأستاذ اللي دخلي على الخاص أنت بعت رسالتك بيني وبينك.. لكن حرد عليك قدام كل الناس في النور وفي العلن، أنا لا بطبل لحد ولا أصلًا بتهز من مخلوق لأني من الآخر مع ربنا لا رئيس دولة حيفتح لي بيتي ولا حينفعني يوم الحساب قدام اللي خلقنا".

وأضافت طلبة: "كل الحكاية أننا كنا زي الغرقانين المتعلقين في قشاية ورايحين في ستين داهية مع ناس ميعرفوش ربنا وكنا متبهدلين -لا فيه بنزين ولا كهربا كنا بنقف طوابير علشان نحط لتر بنزين وكتير ركنوا عربياتهم علشان مش لاقيين بنزين وساعتها لو كان اللتر بمية جنيه كنا حنشتريه علشان نشوف مصالحنا والنور كان بيتقطع بالساعات ومصالحنا بتتعطل وكنا نتمنى النور ييجي ولو ساعة وندفع فيها دم قلبنا".

وتابعت طلبة: "كانت أنبوبه البوتاغاز بــ٤٥ جنيهًا واللا أنتوا نسيتوا واللا يمكن كنتوا عايشين في رخاء وإحنا مش واخدين بالنا دا غير الإرهاب.. ولما جه اللي ينقذنا كلنا اتشعلقنا على كتفه واترمينا في حضنه والحقنا ياجيـــش !!! وكلنا معاك وفعلًا كان قد المسؤولية وكان قد كلمته وأنقذنا عارف أنقذنا من إيه من إننا كان زمنا دلوقتي في خيم اللاجئين وكان زماني أنا ومراتك وبنتك وأختك بنخدم في حاجة هما اخترعوها اسمها جهاد النكاح عارفه واللا تحب أشـــــرحلك".

وأوضحت بدرية: "كل المعاناة شوفناها وتحملناها غصب عننا وكنا مذلولين حضرتك بقى عايزني آجي دلوقتي وأقول على الرئيس اللي شالها خربانة واتحمل كل البهدلة دي وأتهمه؟؟؟ يا راجل عيب عليك دا حتى المثل بيقول اللي مالوش كبير بيشتريله كبير... وأنا اخترته كبيـــري أهينه ليه لأسباب ملهوش دخل بيها ؟؟؟؟؟ أهينه ليه وهو بيعمل المستحيـــل علشانا؟؟؟؟ هو أنتوا ليه محسسني أنه بيكوش وبيحط في خزنة بيتـــه".

واختتمت بدرية: "كل واحد حر في اختياره وفي رأيه.. مانا ساكتة علشان اللي بيستظرفوا وبيقلوا في أدبهم اللي مفكرنا بناكل في أتة محلولة ومش حاسين بالناس !!! لا ياحبيبي أنا زيي زي كل الناس بالظبط أنا الحمدلله قعدة في بيتي لا روحت صيفت في مالديف ولا اليونان ولا إيطاليا!! أنا بنت بلد وحاسة بالغلابة قوي علشان محدش بس يصطاد في المية العكرة... ومن الآخر طالما اخترته لازم أفضل معاه ومع دماغه للآخر وبردو أنا حرة.. أنا عن نفسي حستحمل وآجي على نفسي علشان البلد يتصلح حالها وواثقة في دماغه لأن من الآخر اللي يقدر يعمل كده مع الإخوان ويعيشنا في أمان بعيد عنهم أنا أثق فيه لكن ممكن ميجيش على هواكم ولا على دماغكم اللي لسه عايزنها إسلامية متطرفة مش كده واللا إيه وبقول للي مش عاجبه كلامي يحذفني.. ياريت شوية ديمقراطية وكل واحد حر في رأيه علشان نعرف نعيش".