صديق "طفل المرور" في مصر يصرح بتفاصيل جديدة

تواصل المصدر نشر التحقيقات مع أصدقاء «طفل المرور»، حيث كشف الطفل «يوسف م» صديق المتهم «أحمد ا» الشهير بـ«حريقة» في واقعة الاعتداء على أمين الشرطة بمنطقة المعادى، أن المتهم اتصل بوالده قبل الواقعة وأكد له انه يقود السيارة بصحبة اصدقائه وأن المتهم «أحمد ا» وجه لامين الشرطة الشتائم معتمدا على سلطة والده المستشار.

س – ما الذي حدث يوم الواقعة؟

ج – اللى حصل أن انا يوم الواقعة كنت في بيتى وأحمد ابو المجد وشهرته «حريقة» كلمنى الصبح الساعة 11 صباحا علشان نتقابل وبالفعل اتقابلت معاه بعدها حوالى الساعة 12 ظهرا عند الشبراوى في شارع الجزائر في البساتين وأحمد كان جاى لوحده وسايق العربية المرسيدس سوداء بتاعة والده فركبت معاه العربية وطلعت أنا وهو على بنزينة وطنية في كافية هناك قعدنا فيه وكان هناك موجود مصطفى تامر وعمرو أحمد ورامز عصام وقعدنا في الكافيه حوالى نص ساعة نتكلم وبعدها خرجنا كلنا وركبنا العربية بتاعة حريقة علشان نلف شوية بيها ومشينا ناحية ميدان بيتشو ومرة واحدة لقينا أمين شرطة بيوقف أحمد بالعربية فاحمد وقف له والامين سأله عن الرخص وأحمد رد عليه انه مش معاه فالامين قرب بوشه ناحية أحمد وسأله أحمد انت فين كمامتك فرد عليه قاله مش معايا فاحمد قاله ابعد وشك عنى فالامين سأله تانى فين الرخص فطلب أمين الشرطة منه أنه يركن على جنب وانزلى من العربية فاحمد مسمعش الكلام وداس بنزين وجرى بالعربية فالامين رفع رجله اليمين وخبط بيها باب العربية كسر المرايا ولما شاف المرآه مكسورة نزلنا كلنا من العربية وروحنا كلنا ناحية أمين الشرطة بس كان في المقدمة «أحمد ا» و«عمرو أ» وشهرته تايسون وبعدها أحمد قال لامين الشرطة العربية دى عليها حصانة وراح أحمد قعد يزعق لامين الشرطة وبيقوله انا ممكن اقعدك في البيت ولولا انك راجل كبير كنت قعدتك على الارض وبعدها قاله أنا ممكن اكلك علقة اموتك فانا مسكت أحمد وهديته وبتكلم مع الامين وبقوله خلاص فاحمد قال لامين الشرطة انت لولا انك راجل كبير كنت جبتك على الارض وانا زعقت لاحمد وقولته امشى من هنا وكل الوقت ده كان مصطفى تامر بيصور الواقعة كلها وأمين الشرطة خد باله وقاله أنت بتصور فمصطفى رد عليه وقاله انا بصور اللقطة علشان والده وبعدها خدنا بعضنا وركبنا العربية فقولت لـ أحمد أنت غلطت في أمين الشرطة ولازم ترجع تعتذر له وأحنا كلنا قولنا له كده فاحمد وافق ومشى بعربيته ناحية أمين الشرطة وأحمد ضحك لامين الشرطة وقاله انا أسف والامين قاله اركن وانزلى وبعدها أحمد نزل وقعد يعتذر له وأمين الشرطة قاله متزعلش على المرايا وركبنا العربية وأحمد نزل مصطفى ورامز في البنزينة وبعدها أحمد وصلنى البيت وده كل اللى حصل.

س – ملك من السيارة التي كان يستقها المتهم «أحمد ا»؟

ج – العربية دى بتاعة والده.

س – وكيف وقفت على ان تلك السيارة مملوكة لوالده؟

ج – أنا عارف من زمان ان العربية دى بتاعة والده لان كذا مرة كنت بشوف «أحمد ا» بيسوقها في منطقة المعادى بس أنا في اليوم ده كنت أول مرة اركبها وأحمد ابو المجد قالى في مرة أن العربية بتاعة والده.

س – وما قولك فيما جاء في اقوال المتهم أن والده قام ببيع السيارة للمدعو وائل في بداية شهر اكتوبر 2020؟

ج- أنا أول مرة أسمع الكلام ده ومعرفش صحته ايه بس المعروف في المنطقة أن العربية المرسيدس دى بتاعة ابو أحمد.

س- كيف وقفت على ذلك؟

ج – لان أحمد عدا عليا يوم الواقعة الساعة 12 الظهر قبل ما نروح البنزينة وكان بيكلم والده في التليفون وقاله أنه مع اصحابه بيلفوا بالعربية وده اللى خلانى اقول أن ابو أحمد أكيد عارف أنه بيركب العربية وبيسوقها.

س – ما المقصود بالعبارة التي رددها المتهم «أحمد ا» لامين الشرطة بـ أن العربية عليها حصانة؟

ج – هو أحمد أبوه شغال مستشار رئيس محكمة وبسبب أن العربية دى باسم والده قال للامين أنها عليها حصانة.

س – ما المقصود بالعبارة الواردة بالمقطع الثانى على لسان المتهم «أحمد ا» «والله انا كفيل اكلك علقة اموتك»؟

ج – أحمد قصده أنه يهدد أمين الشرطة وقال كده علشان معتمد على سلطة أبوه وأنه معاه حصانة.

س- ما قولك فيما جاء باقوال المتهم «أحمد ا» بالتحقيقات من أنه خرج من مدرسته الساعة 2:45 مساء في يوم الواقعة وتوجه إلى لمسكن صديق والده وائل ومكث لديه ثم غافله وحصل على مفتاح السيارة؟

ج – الكلام ده كله غلط وأحمد اليوم ده مراحش المدرسة لانه جالى تحت البيت الساعة 12 ظهرا وأنا معرفش هو كان جاى منين قبل ما يجيلى.

س – ما هو سبب قيام المتهم «أحمد ا» بالتحدث مع امين الشرطة بتلك الطريقة؟

ج – هو أكيد بيستهزأ بأمين الشرطة وبيعتمد على سلطة ابوه أنه مستشار وأنا معملتش حاجة وأحمد هو اللى هزأ أمين الشرطة وسخر منه وحتى أول الواقعة عمرو ومصطفى ورامز هما اللى ضحكوا على موضوع الكمامة وأنا ضحكت بس محدش فينا اتكلم ساعتها واحنا اللى خلينا أحمد يعتذر لامين الشرطة.

قد يهمك ايضا

محامي بالنقض يكشف مسار قضية «طفل المرور» بعد إحالته للمحاكمة

تفاصيل جديدة في تحقيقات "طفل المرور" ووالده يتنصل من المسؤولية