المسافر 7

كان أبو عمر يقود السيارة متجه إلى معبد الرامسيوم ... كانت عيني معلقه على الطريق وتذكرت كل شيء عن حياتي الان انا ابلغ من العمر (40) سنة ماذا تركت ؟ ما هي الأشياء التي يمكن أن أتحدث عنها ؟ ما هي أفعالي التي أفتخر بها ؟ ما معنى رحلتي في الحياة بعد كل تلك السنوات

أشياء كثيره مرت علي وأنا أنظر إلى الطريق وكأن الطريق عباره عن سنوات عمرى أنظر اليها وأتاملها

الإنسان ليس بالسنوات التي يعيشها ولكن بما يقدمه للبشر ولكن ماذا يستطيع الانسان ان يقدم الى العالم ما هي الاشياء التي يمكن لشخص بسيط مثلي ان يقدمه إلى عالم مترامي الأطراف

تذكرت حديث دار بيني وبين ابراهيم حين كنا نخطط للرحلة

إبراهيم : المفروض انك تعيش صح جايز تكون نموذج لناس تانية وانت مش واخد بالك

قلت : مش عارف بس حاسس ان كلامك فيه شيء من الصحة لكن لازم يكون في حاجه الواحد بيعملها ويحس انه بيقدمها وان ليه قيمه

ابراهيم : زي ايه

قلت : فكرة .. علم ...

إبراهيم : لو سلوك .. انت عارف ان لو قدرنا نكون اصحاب طريقه في الحياة ده معناه انك بتقدم شيء مهم جدا لغيرك .. احنا فى مصر عشنا سنين طويله جدا من غير أي دليل والدليل هنا مش معناه شخص يمسك ايدك ويعبر بيك الطريق لا دليل يعنى خطة للحياة

قلت : فعلا عندك حق .. احنا في المجتمعات العربية بنعيش زي ما الدنيا عايزة مش زي ما احنا عايزين يعنى بندخل المدرسة ولو حد سألنا انت عايز تبقى ايه نقول معرفش انا كل اللي يهمني اني ادخل الجامعة ودخول الجامعة مش عشان انت عايز ابقى متعلم لا عشان محدش يقول عليك فاشل وبعد الخروج من الجامعة عايز تشتغل والشغل مش عشان انت بتحب الشغل اللى هتشتغله لا عشان محدش يقول عليك عاطل دايما بنعمل كل حاجه عشان حاجه تانية مش عشان احنا عايزين كده

ولكن لماذا استطاعت الاثار ان تحافظ على تواجدها لسنوات طويله بل وتحارب الطبيعة وتحارب الاشخاص والافكار واستطاعت ان تظل شامخه لأنها فكرة والفكرة لا تموت .. لم يكن المصري القديم مجرد انسان يعيش ليأكل او يشرب ومن المؤكد انه لم يكن يعمل بالسخرة السخرة لا تقيم مجد او حضارة ولم يكن فارغ العقل بل كان محب للحياة فنان يعشق ان ينقل تفاصيل الحياة والفكرة بشكل جمالي تلك الاعمدة التي يقيم عليها معابده وقصوره تؤكد شموخه

وفجاه خرجنا من الصمت حين سال ابراهيم ابو عمر : لقب ابو عمر ده جالك منين بقى

ضحك وقال : اصل انا لما إتجوزت كان نفسى اخلف ولد واسميه عمر

إبراهيم : انت لسه عايز تخلف ولد

أبو عمر : تصدق بالله .. انا زينة عندي احسن من مليون ولد معرفتش ده الا لما شلتها

سألته : بصراحه كده انتم بتتعملوا مع الاجانب عشان هما زباين وبتكسبوا منهم فلوس ولا

قاطعني ابو عمر : زمان قبل ما اشتغل معاهم كان عندي فكرة وحشة قوي عنهم .. وكان كل اللي يهمني هو انى اشتغل وبس .. وكنت بشتغل عشان هي دي الشغلانة المتاحة .. لكن بعد الشغل معاهم اكتشفت ان في حاجات كتير قوي اتعلمتها كانت كدب

ابراهيم : زي

ابو عمر : زي انهم معندهمش حلال وحرام زي انهم فاسدين معندهمش اخلاق او انهم خونه

ابراهيم : ولقيت ايه

ابو عمر : لقتهم زينا عاديين فيهم اللي نحبه واللي نكرهه بس الميزة عندهم انهم بيحترموا اللي بيتعامل معاهم فلو في حاجه بتتعمل بضايقنا ما بيعملوهاش

إبراهيم : يعنى تحب تتعامل مع الاجانب اكتر ولا العرب اكتر

صمت ابو عمر لم يجيب وكانه لا يحب ان يكون هناك تمييز او كانه لا يرغب في ان يعبر عن رايه في تلك المسئله

وعلى البعد ظهر معبد الرامسيوم .. معبد صغير .. معبد جنائزي .. كان يخضع لعمليات الترميم

توقفت السيارة وفجأة قال ابو عمر : لو عرفنا ان ربنا خلقنا عشان نعيش مع بعض وان كل الجنسيات وكل البشر ربنا وهبهم حق الحياه وان الكويس النهارده بكره يبقى وحش والوحش ممكن يبقى كويس هنعيش مرتاحين

ثم تركنا امام المعبد وهو يشير الى ساعة يده

أبو عمر : قدامك ساعه تلف براحتك عشان بعد كده هنتغذَّى وتروح وادي الملوك وبعدين الدير البحري عشان نلحق نروح المركب

إتجه إلى الحارس الخاص في المعبد وجلس إلى جانبه يبدو أن بينهم صداقه أعطى الحارس سيجاره لأبو عمر الذى جلس ينظر الى الفراغ  وتمنيت للحظه أن أكون رسام او مصور محترف لالتقط صوره حيث بدا ابو عمر بهيئته وملامحه كانه جزء لا يتجزأ من المكان