رسالة من حورية فرغلي في ظهورها الأول بعد استئصال الرحم

في ظهورها الأول على مواقع التواصل الاجتماعي بعد خضوعها لعملية استئصال الرحم، ظهرت الفنان حورية فرغلي في فيديو نشر عبر الصفحة الرسمية لقناة art على "فيسبوك" وجهت خلاله الشكر للنجوم الذين وقفوا بجوارها في أزمتها، وجمهورها على سؤالهم ودعائهم لها، عاتبة على زملائها الذين لم يتواصلوا معها.

وقالت حورية: "عايزه أقول لمدام صفاء أبو السعود بتفرج عليكي من وأنا صغيرة وطول عمري كان نفسي أكون ضيفة في حلقات حضرتك، شكرا إنك افتكرتيني وبهديلك ورد على قدي صغير وبحبك أوي ونفسي نتقابل على الحقيقة، عاوزة أشكر هوانم الزمن الجميل مدام صفية العمري ومدام ميرفت أمين ومدام ليلى علوي ومدام إلهام شاهين وأستاذ أشرف زكي ومدام مادلين طبر ولطيفة وسميرة سعيد وأحمد زاهر ومحمد رمضان كمان سأل عليا، وناس كتير أوي مش عايزة أنسى حد عشان ميزعلوش".

وتابعت لتحكي عن المكالمات التي تلقتها والهدايا التي أرسلت لها قائلة: "أنا أتولدت برا وعشت برا وكنت في مدرسة داخلية طول عمري، بابي كان في الكويت ومامي كانت مسافرة وأخويا كان في أمريكا وطول عمري كنت محتاجة للحنان والحنية اللي محستهمش وأنا طفلة، وعمري ما تخيلت إني هحس بيهم زي ما حسيت آخر أسبوع لما الدكتور قرر يستأصل الرحم بالكامل ودا معناه إني مش هيكون عندي أي أطفال زعلت شوية بس الحمد لله أنا راضية، تخيلت إن أولاد إخواتي هما أولادي وأي طفل بشوفه هيبقى ابني".

وتابعت: "الحاجة الغربية أن تليفوني من امبارح مبطلش رن من صحفيين وفنانين وناس مش بيشتغلوا في الفن خالص وكمية الدعاء والضحك والحب أنا مكنتش مصدقة نفسي، حصل من الغريب ومحصلش من القريب ودي حاجة مأثرة فيا أوي، وفي يجي 40 شخص أنا معرفهومش ساكنين في العمارات اللي حواليا جابولي شيكولاتة وكيك وفضلنا نتكلم ونضحك، الحكاية دي إدتني قوة وطاقة إني لازم أقف على رجلي وأرجع تاني، أنا الحمد لله بقيت زي الفل ومش هتسمعوا عن عمليات ولا حوادث وهحاول أنقي قصص بتحبوها وأدوار تكون مميزة، هو في عملين مع أستاذ خالد الحجر وأكرم فريد إن شاء الله هندخلهم قريب".

واختتمت كلامها: "أنا أسعد إنسانة في الدنيا لأني عمري ما تخيلت أن في ناس متعرفنيش بتحبني، وبقول شكرا لكل حد دعالي وزعل عشاني وجالي وجاب لي ورد، أنا فخورة إني مصرية لأن معتقدتش في بلد تانية عملت كده مع فنانة مرت بظروف صعبة والناس كلها وقفت جنبها".

قد يهمك أيضــــــــــــــــًا :

حورية فرغلي تتعرض لمواقف مؤثرة بعد الجراحة

حورية فرغلي تتحدث عن معاناتها بسبب منعها من التبني