الباعَة الجائلون المتضررون يستنكرون إجراءات الأمن والمواطنون يُرَحِّبون

واصلت الأجهزة التنفيذية في محافظة الإسكندرية، بالتعاون مع مديرية الأمن، حملاتها على الباعة الجائلين لليوم السابع، وسط اعتراض من الباعة المتضررين من تلك الحملات، وقبول لدى المواطنين.
وأكد اللواء طارق مهدي محافظ الإسكندرية، في تصريحات، أن الحملات مستمرة، ولن نسمح للفوضى أن تعود إلي شوارع الإسكندرية.
وقال: نحن نبحث أزمة الباعة الجائلين، ونحاول إيجاد بدائل مناسبة لهم، لكن بعيد عن الطريق العام الذي هو مِلْك للجميع.
وقاد اللواء أمين عز الدين، مساعد وزير الداخلية لأمن الإسكندرية، اليوم "الثلاثاء"حملة أمنيّة مُكبّرة في قطاع غرب في مناطق البيطاش والهانوفيل، وشرق الإسكندرية في مناطق شارع خالد بن الوليد، حيث قامت شرطة المرافق برفع كافة الإشغالات والتعديات في الطريق والتي تعيق الحركة المرورية بالإضافة إلى قيام إدارة المرور بفتح الطريق أمام السيارات والعمل على تسيير الحركة المرورية تسهيلاً على المواطنين فضلاً عن ضبط كافة المخالفات المرورية ورفع السيارات المخالفة.
أشار اللواء عز الدين، إلى أن الحملة أسفرت عن رفع عدد 806 حالات إشغال طريق متنوعة وباعة جائلين مفترشين الطريق العام وتنفيذ قرارات إدارية صادرة من المحافظة بإزالة الأكشاك المخالفة بالإضافة إلى ضبط 2771 مخالفة مرورية متنوعة.
وصفت علياء يوسف، إحدى سُكّان شارع خالد بن الوليد، في منطقة سيدي بشر شرق الإسكندرية، " الشارع عاد لينا تاني، أنا كنت حاسّة أن شارعنا عبارة عن باعة جائلين في الطريق، وشوية سكان عايشين معاهم".
وأضافت :" الشارع كان شكله يزعَّل والسكان على مدى سنوات يئسوا من أن الباعة الجائلين دُوْل يمشوا من هنا لأنهم عاملين زيّ الاستيطان بالضبط".
أضاف أحمد سعيد، أحد العاملين في محل تجاري في الشارع ذاته، "مَكُنَّاش عارفين نشتغل من الفَرْشَة اللي كانت قُدَّام المحلات بتاعتنا، يعني احنا كنا ندفع نور ومَيّه وضرائب، وهمّا يبيعوا أكتر ويكسبوا أكتر، وبعض أصحاب المحلات، كان بياخد منهم أرضية عشان يسمح ليهم أنهم يفرشوا قُدَّامه".
فيما اعترض عدد من الباعة الجائلين على الحملات الأمنية ضدهم، وقال "م،أ"، في شارع خالد بن الوليد، " احنا مكناش بنسرق، وكنا بنعيش بالحلال، دلوقتي نروح فين، والشباب اللي كانوا شغّالين في الشارع جنبي يعملوا إيه، دول كان فيهم ناس بتسرق وتابت، ترجع تسرق تاني، هو الحلال مينفعش في البلد دي؟!".
وقال "س،ع"، في منطقة الهانوفيل، " احنا كنا بناكل عيش بالحلال، مكنّاش بناخد رشوة من حد، ولا بنبيع مخدرات، ولا بنقبل علي نفسنا الحرام، وكمان كنا بنخدم الناس لأننا كنا بنبيع الحاجة بأسعار تناسبهم، وكانوا بيدعولنا".
فيما أشار محمد محمود، سائق تاكسي، إلى الوضع بقوله:" أنا لما كنت بدخل المنشية بالتاكسي، كنت باخد أكتر من ساعة، دلوقتي العربية بتجري وبادخل واخرج في عشر دقائق، بعد حملات الإزالة".
وأضاف: " أنا عايز أقول للباعة الجائلين اللي بيقولوا إنهم خسروا أكل عيشهم، أنهم كانوا بيضُرُّوا ملايين أكتر منهم بكتير في أكل عيشهم، لأنهم بيوقّفوا الشوارع اللي هي مش بتاعتهم لوحدهم".
كانت مديرية أمن الإسكندرية قد نجحت على مدى الأسبوع الماضي، في إزالة الباعة الجائلين من مناطق محطة الرمل، والمنشية ومحطة مصر، وميامي، وغيرها من المناطق الحيوية في الإسكندرية.