سيدة تُقيم دعوى "طلاق" ضد زوجها بعد تزوجه من أخرى في منزلها

أقامت سيدة دعوى "طلاق للضرر"، ضد زوجها، بعدما تزوج عليها في مسكن الزوجية من سيدة مطلقة تصغره بـ9 أعوام، وأسكنها معهم في نفس الشقة، ما دفعها إلى ترك المنزل وإقامة دعوى طلاق للضرر لضمان حقوقها.

ونشبت خلافات بينهما منذ فترة الخطوبة، فيروي الزوج الأربعينين حسب ما ذكرت وسائل الإعلام، "اتعرفنا بشكل تقليدي كانت عندي في المعرض بتشتري عربية مع والدها وأخويا أتعرف عليهم وكان شكلها بنت ناس ومحترمة رشحالي كعروسة وبالفعل روحنا زورناهم في البيت وشكلها كان طيب وأتخطبنا، لكن بعد الخطوبة مكانش في تجاوب منها معايا في أي حاجة، هي دماغها تقليدية جدًا، كل حاجة عيب وغلط وحرام ولازم أرجع لبابا، مكنتش مرتاح بس أخويا قالي مينفعش أسيبها عشان دخلنا البيت وعيب وإنها هتتغير بعد الجواز وتطبع بطباعي فاضطريت أكمل".

وأضاف، "من أول يوم مكانتش رومانسية ولا بتندمج معايا ومكسوفة طول الوقت جد جدًا، لو هزرت ولا عملت أي حاجة تقلب بوزها عليّ وتتقمص مكنتش حاسس إنها واحدة ست وبتدلع عليّ زي الستات، بدأت أحاول أتكلم معاها وإنها تتغير فوجئت برد صعب أنا كدا ومش عاجبك أنت حر ومش هتغير عشان حد وكلام ملوش لزوم ومينفعش يتقال لراجل ووقتها زعلت وغضبت عند أهلها لكن استحملت عشان كانت حامل ورجعتها البيت وبدأت أحاول أتعود عشان بناتي".

وتابع الزوج، "أنا مبنكرش إني خونتها وأتجوزت عليها لأنها عمرها مكانت ست معايا، طول الوقت حاسس إنها عسكري مبتحسش، لحد ما تعرفت على مراتي الجديدة ومشاعري أتحركت غصب عني وأتجوزتها في السر، وبالصدفة هي عرفت بحكاية الجواز عملت مشكلة وطردتني من البيت، فكرة إني أحس إنها أهانت رجولتي بالكلام مستحملتهوش وجبت لها مراتي التانية في البيت عشان تعلمها أزاي تبقى ست، أنا راجل مقتدر وحقي أتجوز زي منا عايز وهي بيتها وبناتها مش ناقصهم حاجة، والبيت كبير ويساع ألف، أنا معيشها في فيلا متحلمش بيها ولها فيها دور كامل".

قد يهمك أيضاً :

مصرية تشعل النار في زوجها بسبب خلافات مالية في الأميرية

تعرف على أغرب قضايا "الخلع" في المجتمع المصري