خالد الغندور يكشف سبب هزيمة "الزمالك" أمام "الأهلي"

أرجع لاعب الزمالك السابق، الإعلامي خالد الغندور ، خسارة نادي الزمالك من الأهلي لعدة عوامل أهمها تفوق المعسكر الأحمر في تأهيل لاعبيه نفسيًا قبل المباراة.
 
وتابع الغندور، في برنامجه "اللعبة الحلوة مع بندق" على قناة LTC: "لعيب الكورة بيبقى عنده دوافع، لما كنا بنلعب في نهائي أفريقيا أو السوبر الأفريقي أو دوريات بتحدد المصير بيبقى عندنا الدافع إن احنا نكسب، طول ما أنت عندك النهاردة القدرة على الفوز بالبطولة لازم تبقى قدها، النهاردة الزمالك عنده دافع، النهاردة ده إحنا هنحتفل بالدوري وكمان على حساب مين، على حساب النادي الأهلي".
 
وأضاف الغندور: "طيب تعالوا الناحية التانية، أه شفتوا اللي حصل بقا ومرتضى منصور ومحمود طاهر والجمهور والـ10 آلاف والـ15 ألف اللي جم الاستاد اللي خلوا اللعبية تموت نفسها، فتحي مبروك اللي كل شوية هيجيبوا مدرب أجنبي، هيجيبوا معرفش إيه، فتحي مبروك مؤقت، فتحي مبروك معرفش إيه، كل ده دافع عند المدير الفني لا لازم نكسب الزمالك، فتحي مبروك عايز يقول لا أنا جامد بقا، هتقعدوا تقولولي مؤقت ومش مؤقت لا أنا جامد".
 
وتابع الغندور: "لاعيبة النادي الأهلي عايزة تقول جاريدو هو السبب، واحنا في ماتشين 3 لو مهربوش مننا كان زماننا في الدوري وهنكد عليكوا وهنكسبكوا، فالدوافع موجودة عند الفرقتين، بس من المفترض إن دوافع نادي الزمالك أقوى بكتير ولكن لما بيكون عندك فرصة واتنين وثلاثة وأربعة.. هل لوجود فرص كتيرة للفوز بالدوري خلى لعيبة الزمالك نايمة".