بكت إحدى سيدات سيناء، بسبب عدم ذكر محافظة شمال سيناء، في التقرير الذي تم عرضه عن المحافظات التي تواجه التطرف، قائلة "اتكلمتوا عن الإسماعيلية ومحدش قال شمال سيناء يا ريس، احنا بنموت وطالع عنينا".

وتابعت السيدة خلال كلمتها في مؤتمر الشباب الوطني في الإسماعيلية، "احنا محرومين من المواد التموينية، وربنا يعلم إحنا عايشين إزاي، بنقعد باليوم واليومين عشان نعدي، محدش حاسس بينا ولا عارف حاجة عننا". وأضافت "بندخل مواد البناء بصعوبة رغم أوامر المخابرات، محتاجين تسهيلات لحياتنا يا ريس، مش هنحارب الإرهاب إلا بالتنمية، وبلاش تتكلموا عن شمال سيناء أنهم إرهابيين احنا من الشعب وتعبانين، ومحتاجين لجان شعبية في كل شوارع العريش".

 واستكملت "كل اللي بيتكلم بيطالبوا بإخلاء سيناء هنروح فين يا ريس؟"، فرد الرئيس عبدالفتاح السيسي، "أهدي يا شيماء، مش هتروحوا في مكان، الدولة اللي بتقدر موقفكم، حقك عليّ أنا، انتوا على رأسنا وليكوا تاريخكم واللي ينكروا هيبقى جاحد، لو فيه سقطة في الإعلام متجوش على مصر، ساعات رد الفعل بيقى مختلف، أنا مش بدافع عن الإعلام، بس بلاش تفهموه غلط محدش يقدر يسئ لكم، ولو عايزين نخلي سيناء كنا عملنا الكلام ده من زمان، طولوا بالكوا على مصر ومش كل حاجة تاخدوها على أعصابكم".