رد غير متوقع من نسرين طافش على هاجس التقدم فى العمر وعمليات التجميل

تحدثت الفنانة نسرين طافش عن رؤيتها لمفهوم الجمال ومعايير الجاذبية بالنسبة لها، مؤكدة أن الجمال لا يقتصر على المظهر الخارجي فقط. وقالت خلال لقائها مع :"أنا بشوف إن كل سيدة جميلة على طريقتها الخاصة، ولكل واحدة جمالها المختلف، لأننا مش كلنا شبه بعض. الشخصية بتفرض نفسها، الحضور، الكاريزما، الأسلوب".
نسرين طافش تكشف عن مفهوم الجمال بالنسبة لها
وأشارت نسرين طافش إلى أن كل ما ذكرته عوامل أهم من الشكل الذى تضعه فى المرتبة الثانية موضحة:"كل البنات حلوين، لكن اللي بيفرق إنسان عن التاني هو شخصيته وطريقة تفكيره وتعاملاته. الجمال الحقيقي بالنسبة لى هو إن الإنسان يكون متزن، محب، متصالح مع نفسه، ومركز في حياته. ده بالنسبة لي المغناطيس الحقيقى للجاذبية."

وتابعت نسرين طافش: "أنا لا أعتبر الجمال التقليدي، زى جمال الوجه أو الجسم، هو الأساس. بالعكس، الناس كلها لما بتلبس بشكل حلو وتعتنى بنفسها بتظهر جميلة، لكن ما يبقى بيبقى ويترك الأثر الحقيقي هو النفسية والأسلوب والتعامل. ودى عندى أهم من أى شىء."
عدم الخوف من التقدم فى العمر
وعن خوف الفنانات من التقدم في العمر، أوضحت نسرين أنها لا تحمل أي هاجس تجاه ذلك، قائلة:"أنا عمري ما فكرت بخوف من التقدم فى العمر أو من التجاعيد. حتى صحباتى ساعات بينصحوني أعمل بوتوكس، لكن بالنسبة لى التجاعيد دي جزء طبيعى من ملامح الوجه، زى تضاريس حلوة بتدى شكل مختلف. أنا شايفة إنها مش حاجة وحشة أبداً. بالعكس، كل مرحلة عمرية ليها جمالها الخاص".

وأكدت نسرين على تشوقها لرؤية شكلها بعد الكبر وفى كل مرحلة موضحة:"المهم إن الإنسان يعمل الرتوش البسيطة الضرورية من غير ما يبالغ، عشان يفضل محتفظ بروحه وبملامحه الطبيعية. الإفراط في التجميل بيخلي الشكل يروح، واللي بيلعبوا كتير في ملامحهم بيخسروا حلاوتهم لما يكبروا. كل ما الإنسان يفضل قريب من الطبيعي كل ما كبره بيبقى أحلى".
الروتوش التى أجرتها وموقها من عمليات التجميل
وعن طبيعة "الرتوش" التي أجرتها، قالت نسرين:"أنا بتكلم عن الرتوش البسيطة، مش عمليات التجميل المبالغ فيها. فعلاً أنا عاملة مناخيرى من زمان، وما بخجل أقول ده، بالعكس معنديش أى مشكلة. لكن ضد إن حد يغير نفسه بالكامل أو يقلد شكل فنانة أو نجمة تانية. إذا فى حاجة مضايقاك ومحتاجة تتغير اعملها، ده وشك وشكلك وأنت حر، بس من غير مبالغة. الأجمل إن الإنسان يعمل الحاجات اللى شبهه هو، مش اللي تخليه نسخة من غيره".

  قد يهمك أيضــــــــــــــــًا :