مي عمر توجه رسالة غاضبة لأحد زملائها بعد حديثه عن الترند

شنت الفنانة مي عمر عبر منشور وضعته على حسابها الخاص بـ"فيسبوك" هجومًا حادًا على أحد زملاء المهنة وصفته بأنه ليس ممثلاً، بسبب هجومه على الترند خلال موسم رمضان، ليفاجئ الجميع بفرحته بعد دخول مسلسله الذي يعرض حالياً الترند.

وأعربت مي عن غضبها، قائلة: زميل، (مش ممثل)، وكنت بعتبره صديق، طلع في رمضان كتب بوست بيتريق فيه على الناس اللي بتفرح وتشارك إنها ترند رقم واحد، والبوست كان كله بقى: (التريند مش هدف الشغلانة) و(إحنا بنشتغل عشان الفن مش الأرقام).. كلام تنظير وفزلكة على أعلى مستوى".

تابعت: "أنا ساعتها قلت مش هرد، وكنت سايبة الأيام تكشف، عشان كنت عارفة إن عنده مسلسل هيتذاع أوف سيزون، وأول ما يقرب من أي ترند حتى لو دخل رقم عشرة نص ساعة، هيبقى مش مصدق نفسه وهيقعد يشارك ويحتفل كأنه فتح القدس".

وأضافت: "وفعلا.. مكدبش خبر! أول ما مسلسله دخل الترند، بقى بيشارك فرحان إنه (رقم واحد)، الله! هو الترند كان وحش في رمضان وبقى جميل دلوقتي؟".

واستكملت مي عمر حديثها قائلة: "طبعا أنا مش ضد إن أي حد يفرح بنجاحه، بالعكس مبروك والله، ومن حقك تفرح وتشارك لإن ده تعبك ومجهودك، بس ياريت نبطل المنظر بتاع: (أنا مختلف… أنا فوق التريندات) وبعد كده أول ما نقرب منها نطير من الفرح وننشر 20 ستوري".

مي عمر: لا أوجه كلامي لأي نجم شارك في العمل

واختتمت مي عمر منشورها بقولها: "أنا عارفة إن أي حد يعرفني كويس هيستغرب من كلامي، لأني عمري ما رديت على حد، بس بجد ليه إحنا شطار جدًا في إننا نحرّم على غيرنا حاجة، ولما تيجي في ملعبنا تبقى فجأة أحلى حاجة في الدنيا؟ في الآخر، الترند مش هدف، غير لما يبقى معانا، للتوضيح، كلامي مش موجّه لأي نجوم شاركوا في العمل بالعكس أنا بقدّرهم وبحترمهم علشان ماحدش يفهمني غلط".

يُذكر أن مي عمر شاركت في رمضان الماضي بمسلسل "إش إش"، والذي حقّق نجاحًا كبيرًا طوال فترة عرضه، وضم العمل كلًا من: ماجد المصري، انتصار، دينا، هالة صدقي، ندى موسى، إيهاب فهمي، محمد الشرنوبي، وغيرهم، تأليف وإخراج محمد سامي.

  قد يهمك أيضــــــــــــــــًا :