القبض على 3 بودي جاردات في واقعة "أسرة التجمع"

 ألقت أجهزة الأمن في القاهرة، القبض على 3 بودي جاردات لاتهامهم في واقعة الاعتداء بالضرب على أسرة كاملة في ضاحية التجمع الخامس، وجار البحث عن الطرف الأول في المشكلة وزوجته واللذين حرضا على اقتحام الفيلا.

وأفاد مصدر أن رجال المباحث تمكنوا من القبض على 3 بودي جاردات من المتهمين عن طريق تفريغ كاميرات المراقبة بالمنطقة.

كان مستخدمو مواقع التواصل الاجتماعي تداولوا منشورًا يتضمن واقعة لتعدي مجموعة من البلطجية على مواطن وزوجته وزوجة ابنه وطفلتها بالضرب، لمجرد أنهم طلبوا أحد مالكي السيارات بضبط السرعة، أثناء المرور أمام بيتهم، نظراً لوجود أطفال قد يتعرضون للخطر.

وقالت السيدة، إنها تسكن في التجمع الخامس النرجس 2، وإنها كانت تجلس في جنينة الفيلا تلعب مع ابنتها وفجأة وجدت أكثر من 40 "بودي جارد" على بلطجية يقتحمون الفيلا ويطلقون النار بشكل عشوائي واعتدوا على زوجها ووالده ووالدته بالضرب، وأصيبت هي بكسر في القدم، بسبب معاتبة والد زوجها سيدة كانت تقود سيارتها بسرعة جنونية أمام الفيلا، حسب قولها.

وأضافت صاحبة المنشور: "راحت دايسة بنزين أكتر كانت هتخبط لي بنتي فحمايا بيقولها متفتح يا حمار، بعد ما العربية عدت راحت رجعت بضهرها قالتلوا أنت بتشتمني أنا والله لحزنك على عيالك".

واستكملت: "إذا دعتك قدرتك على ظلم الناس فتذكر قدرة الله عليك، حسبي الله ونعم الوكيل كل اللي عايزة أقولو أنها كانت ست لابسة أسود والعربية جيب سودة متفيمة أسود يعني أصلا عمو مش شايف جواها مين ست أو راجل مش قاصده يعني أكيد وبعد ما عملوا اللي عملوه فينا وكل البوابيين واقفين يتفرجو خايفين من الرشاشات جات الست بعربيتها تاني بصت من الشباك أن كله تمام وأن أبواب الفيلا والشبابيك اتكسرت وإن الست الكبيرة اللي عندها 60 سنة واقعة على باب الفيلا وأنا رجلي اتكسرت ومش عايزة أقولكم على الألفاظ اللي اتقالت وجوزها كان زي المجنون وبيقول أنا مراتي تعيط يا ولاد الـ...، وراح زاققني وكسر الكرسي على رجلي وقطعلي التيشرت عايز يعريني وسط الشارع ولقيت واحد بيقول انا هقلعك ملط يا ولاد الـ...".

واستكملت صاحبة المنشور: "الحمد لله الفيلا اللي جنبنا مركبين كاميرات والراجل كان مسافر أمريكا كلمناه وقالنا أنا سايبها شغالة وهيبعتلنا مدير أعماله الصبح يفتحهالنا ومسكوا 3 بس يارب ادعو لحد الصبح ميجوش يكسرو الكاميرات في الفيلا اللي جمبنا أقسم بالله العظيم إن اللي بيحصل في الأفلام ده مش من خيال كاتب ده بيحصل وموجود بس اللي لحد الآن مش قادرة أصدقوا، إن ده كلو يحصل عشان مشادة عادية من واحدة كانت بتسوق بجنونية في شارع سكني وبين راجل كبير في السن زي والدها وإن جوزها وهو بيضرب بيقول أنا مراتي تعيط يا ولاد الـ... أنا عندي 5 فيلل في التجمع أنا همشيكو من المنطقة".

وتابعت: "اكتشفنا أن عنده مدرسة خاصة في القطامية"، مؤكدة أنها تطلب حقها وألا يأخذ الأمر بعدا سياسيا، مطالبة بمحاسبة مرتكبي الواقع حتى لا يتكرر الأمر ونتخلص من الفئة الفاسدة في المجتمع الفساد البلطجة".

وقالت السيدة إن ضباط مباحث قسم أول التجمع الخامس أرسلوا دوريات ليلية لحمايتنا وتعاونوا معنا جدا، مقدمة الشكر لهم على اهتمامهم الله مضيفة: "بإذن هناخد حقنا".