خبير اقتصادي يكشف عن اتفاق بين مصر و"النقد الدولي" يمس أسعار البنزين

كشف الخبير الاقتصادي، سامح أبوعرايس، معلومة خطيرة بشأن اتفاق جديد تم بين مصر وصندوق النقد الدولي، قائلًا في تدوينة عبر حسابه في "فيسبوك": "قريب اللي هيحصل في سعر البنزين مش مجرد رفع بنسبة معينة زي كل مرة .. لكن تعويم كامل لسعر البنزين .. وده تم الاتفاق عليه بالفعل بين صندوق النقد الدولي والحكومة وبدأ العمل على تحديد آلية للسعر بصورة يومية .. يعني إيه تعويم لسعر البنزين ؟ يعني يبقى زي أوروبا وأميركا مثلا السعر مش محدد من الحكومة لكن حسب سعر برميل البترول يوميًا .. وممكن السعر يختلف من يوم ليوم عادي".

وأضاف أبوعرايس: "نفترض مثلًا أن السعر النهاردة 5 جنيهات للتر وثاني يوم ارتفع سعر البنزين عالميا 20 % يبقى هتلاقي سعر لتر البنزين ثاني يوم بقى 6 جنيهات .. لو اليوم اللي بعده نزل السعر شوية ممكن تلاقي اللتر بقى بـ 5.50 وهكذا".

وتابع الخبير: "الآلية اللي هتتعمل هتكون بحساب سعر البنزين عالميًا وسعر الدولار في نفس الوقت .. يعني ارتفاع وانخفاض سعر الدولار يؤثر على السعر .. علشان أقرب لكم الصورة زي سعر غرام الذهب حاليًا مثلًا .. بيختلف من يوم ليوم وأحيانًا من ساعة لساعة وبيتغير حسب تغير سعر الذهب عالميًا وحسب سعر الدولار، كمان لأنك بتحسب السعر عالميًا بالدولار وبعدين تحولها جنيه مصري ... ده اللي هيحصل بالضبط في سعر البنزين .. وده هيبقى معناه إن الدولة هتشيل إيدها تمامًا من سعر البنزين .. وهتلغي الدعم تمامًا وهيبقى السعر خاضع لتقلبات الأسعار العالمية ويرتفع وينزل مع ارتفاع ونزول أسعار برميل البترول وأسعار البنزين عالميًا .. ده بالمناسبة معناه موجة غلاء جديدة".