تامر أمين يطالب بتعديل لوائح الأجور الخاصة بأعضاء البرلمان

طالب الإعلامي تامر أمين، أمس الثلاثاء، وزير العدالة الانتقالية، المستشار مجدي العجاتي، بتعديل لوائح الأجور والمكافآت والبدلات الخاصة بأعضاء مجلس النواب القادم، قائلًا: "الأموال التي تُمنح لأعضاء البرلمان سفه وتبذير، تحس إنهم جايين يأمنوا مستقبلهم ويمشوا، وهم في الأصل جايين لخدمة تطوعية".

وأضاف أمين، خلال برنامج "الحياة اليوم"، عبر فضائية "الحياة"، "تخيلوا يا سادة أن النائب أول ما يخش البرلمان بياخد 30 ألف جنيه مكافأة دخول، وهو لسه بيقول بسم الله الرحمن الرحيم ومعملش أي حاجة، عشان يجيبله كام بدلة وكرفتة وشوية لحمة للعيال.. إحنا بنديله جايزة عشان بقى نائب، حاجة عجب العُجاب".

وتابع: "في إمكانية النائب البرلماني أيضًا أن يحصل على مليون جنيه قرض، ليه؟ الله أعلم، كأننا بنقوله تعالى آمن نفسك ودي مكافأة نهاية الخدمة وروح أقعد في بيتكم، والبدلات من 12 لـ15 ألف في الشهر للنائب، اضربوا الرقم ده بقى في 600 نائب، واعرفوا فلوس مصر والغلابة بتروح فين".

واستكمل: "اللي نجحوا في المرحلة الأولى أخدوا شنطة فيها كُتيب عن البرلمان، ودبوس يتعلق في البدلة أم 30 ألف جنيه، وتابلت (جالكسي سي 5)، ثمنه 6 آلاف جنيه، ليه؟ بأمارة إيه؟ بخلاف إن 70% من البهوات مبيعرفوش يقرأوا ولا يكتبوا أصلًا، يعني ميعرفوش يعني إيه تابلت وفاكرينه صنية للشاي في البيت".