عمرو أديب يعرب عن أسفه الشديد بعد الهزيمة الثقيلة للزمالك

أعرب الإعلامى عمرو أديب، عن أسفه الشديد، بعد الهزيمة الثقيلة التى منى بها فريق الزمالك أمامه نظيره الاهلي، بثلاثية نظيفة خلال المباراة التى جمعتهما مساء اليوم، الاثنين، باستاد القاهرة، في ختام منافسات الدور الأول لبطولة الدوري العام.

وقال "أديب" ببرنامجه "كل يوم" المذاع عبر فضائية "ON E"، :" إنها نفس المباراة التى أشاهدها منذ 50 عامًا، نفس المعلقين اللى أغلبهم أهلاوية، ونفس التعليقات، لكن ما أغضبنى الهزيمة اللى دايما بتبقى مرة 3/0 أو 6/1..الزمالك لم يفز على الاهلي منذ 2007 في الدوري .. حدثت ثورتان ومليون حرب والإخوان مشيوا والدنيا اتغيرت، وعملنا 100 كوبرى، وتفريعة قناة السويس، ومظاهرات إيران ولكن الزمالك لم ينجح في الفوز على الاهلي"، معقبا : "دى لعنة.. أمى دعت عليا وقالت روح يا ابنى يارب تبقى زملكاوى..أشياء كثيرة تغلبت عليها في حياتى.. كنت تخين خسيت.. إلا الزمالك..هل فيه فريق في الدنيا لديه الحظ المهبب ده.. ودلوقتى طالعين في موضة جديدة يقولك هنغير اللاعيبة.. لا تغيروا المدرب ولا اللاعيبة..غيرونا إحنا غيروا الجمهور عشان نستريح ..اللى بيتعمل في الزمالك دا حرام ".

وأضاف: "المرار مش بيشربوا غير الزملكاوية .. دا حرام ومش عدل، والواحد المفروض أنه يبل ريقه عشان يعرف إنه على حق لبعض الوقت.. بس على طول ضرب ضرب .. هو مفيش حاجة تانى؟".

وواصل غاضبًا: " تعبنا بقا فيه إيه!..أنا بجد مش فاهم، النادى متبهدل، وأكيد فيه سبب وفيه حاجة غلط.. العيب مش في النادى  ولا الإدارة ولا اللاعبين.. العيب فيا أنى مُصر  ومتعذب..أنا إنسان محب للحياة وفى آخر حياتى ومركب دعامة .. خلاص مش ناقص كمان مجدى عبد الغنى يقتحم المحطة ويقول لى بعد الهدف الثالث  - لسه كمان - .. دا اسمه تحرش"، متوجهًا بالتهنئة للنادى الاهلي على الأداء والنتيجة.