هبة رشوان توضح ملابسات واقعة ورقة النتيجة خلف أوراق الاسكريبت

اجتاحت حالة من الجدل مواقع التواصل الاجتماعي خلال الأيام الماضية، بعد تداول صورة للمذيعة "هبة رشوان" مقدمة برنامج "امرأة عصرية" عبر القناة الأولى في التليفزيون المصري وهي تمسك ورقة نتيجة خلف أوراق الاسكريبت، وتناقلها رواد السوشيال ميديا بسخرية مما وصفوه بـ"سوء الحال الذي وصل إيه ماسبيرو"..
 وفي حوارها لـ"مصراوي" أكدت "رشوان" أن تلك الورقة أعطاها لها ضيف الحلقة بعدما دون فيها ملاحظات حول موضوع الحلقة، وأكدت أنها غير مسؤولة عما حدث، وأن الخطأ يقع على عاتق مخرج البرنامج لأنه لم يغلق الكادر أو ينبهها إلا بعد مرور أكثر من دقيقة، واتهمت الشخص الذي نشر الصورة المقتطعة لها بالتشهير، وأوضحت أنها تفكر في مقاضاته..
 
وأوضحت المذيعة المصرية أن المخرج هو المسؤول مش ممكن يكون مخدش باله، لأن أولاً أنا بقعد 5 دقايق "ستاند باي" قبل ما أطلع هواء وقعدنا نركب المايكات والإيربيس "سماعة الأذن" ونسيت الورقة في إيدي ومبصتش فيها، المخرج مكنش شايف الورقة في إيدي قبل ما أطلع!، هنفترض إني كنت حطاها على حجري، لما فتح الكادر المفروض يلفت نظري، فتح كادر ما بياخدش نص ثانية، كان يقولي نزلي الورق يا أستاذة.
 
ده نزل الاسم وغطى الأجندة وبعدين شاله فبانت ورقة الأجندة وسابها مفتوحة، إزاي مش شايفها!، أنا بقوله انت مغطتش كادرك ليه، مقفلتش وسترت مذيعتك ليه. لم أوجه نقد له.. ماذا يفيدُ سلخ الشاه بعد ذبحها، إحنا مع بعض من سنة 1993 لأنه مخرج تنفيذ وكان معايا وأنا مذيعة ربط، وهو مخرج البرنامج من سنة 2009.
 
كان فيها خواطر كاتبها الضيف عن موضوع الحلقة اللي هو "فريضة التفكير"، كنت بتناقش معاه قبلها ولقيناها هتدخل في أكتر من فرع، فطلبت منه نحط أولويات لنقاط المناقشة، والضيف من كتر ما هو حريص على عمله وبيطلع معايا في البرنامج من 2009، ساعات الضيف متطوعا بيكتب نقاط ويديني يقولي يمكن تساعدك في الإعداد.
 
هبة رشوان: من شتمني شهٌر بيا على الملأ و"بيصالحني في زنقة".. وتراودني فكرة مقاضاته لأنه "علالي مزاجي شوية"
 
وكشفت أن "اللي نشر الصورة هو إعلامي زميل، وكانت لقطة مقتطعة؛ وده تشهير ومعلومة خاطئة وترصدّ مؤكد لأنه اقتطع لقطة من الحلقة، وحسيت إنه قاصد يسيء ليا، وأنا عمري ما شفته ولا سمعت عنه غير بعد الموضوع ده، وقلت: "باب النجار مخلع" لأنه مكلفش نفسه يسألني. مش عارف تتصل تسأل إيه حقيقة الورقة دي من أين لك إن ده اسكريبت". لما نزلت الحلقة على يوتيوب والناس عرفت الحقيقة بعتلي اعتذار على الماسنجر، زي ما يكون بيشهر بيا على الملأ و"بيصالحني في زنقة".
 
تراودني الفكرة، لما أروق وأشوف ممكن أقاضيه ولا إيه، لأنه أصابني بالضرر، مش أصاب تاريخي بالضرر ولكن "علالي مزاجي شوية" وأجهدني في مشقة الرد. إلى الآن محدش قالي إني متحولة للتحقيق، وبعدين ثُبت إن ورقة الأجندة مش اسكريبت يبقى هتحول للتحقيق ليه ولا هتحاكم على إيه؟، وعمومًا أنا في حلقة يوم الخميس قلت للمشاهدين إذا كانت اللقطة أذت عيونكم فنعتذر.
 
وعمومًا تحويل فريق عمل البرنامج للتحقيق ليس أمراً مشينًا، ده اسمه تحقيق يعني إدارة ماسبيرو بيشوفوا إيه اللي حصل بالظبط، وأعتقد إني هتسأل كشاهد.
 
ووجهت الشكر لمن دعموني خلال حلقة البرنامج أمس، وقلت بشكر زملائي اللي دعموني ولكن بعد ما تيقنوا إني صح، وهناك إعلاميين طلبوني في مداخلة لكني قلت "مبتكلمش على بيتنا بره البيت".

الخبرات مبتخلصش ويموت المعلم ولا يتعلم، لكن الدرس اللي اتعلمته إني من الأسبوع الجاي هنزل حلقاتي على يوتيوب بنفسي، للأسف البرنامج بتاعي مبينزلش يوتيوب لأنه نفعني في الموقف ده.. الشخص اللي نزل الصورة كان متعمد واستد إلى أن الحلقة مبتنزلش يوتيوب، لو كان يعرف كان فكر ألف مرة قبل ما يشهر بيا.

مضيفة بقالي 27 سنة مذيعة على الهواء، تعرضت لمواقف كثيرة وأنا أشرف منها، وطلعت منها لأن أنا متدربة تدريب شديد القسوة، واتعرضت كتير لـ"بلو" لكن عمري ما تحولت للتحقيق، ده أنا ست موسوسة وحريصة على اتباع القوانين.

 وعلى العكس؛ ما حدث دليل قيمة ماسبيرو عند المصريين، ومش هقول أكتر من كده، والحلقة التي ظهرت فيها "ورقة النتيجة" تجاوزت 52 ألف مشاهدة على يوتيوب.