مصرية تطلب الخلع من زوجها لزواجه من أخرى بمالها الخاص

بدأت "بسمة" تروي تفاصيل طلبها الخلع من زوجها "سامي.ع" بعد زواج دام 5 سنوات، أنجبت خلاله طفلتين، إذ قالت: "خلاني أبيع شقتي اللي ورثتها من أبويا والدهب بتاعي بحجة أنه هيسافر يشتغل برا ويحسن أوضاع دخلنا، وخد مني الفلوس راح إتجوز بيهم وأنا ماعرفتش غير بعدها بـ7 أشهر".   وقالت إنها لم تقصر معه في شيء، فكانت تقف بجانبه وتشجعه وتدفعه للأمام، لكنه ترك كل هذا وراء ظهره وتزوج من حبيبته السابقة، بعد أن تطلقت من زوجها: "راح اشترالها شقة بفلوسي في إسكندرية واتجوزوا فيها، كان مفهمني إنه مسافر إيطاليا وبعد شهرين رجع وقالي إن ورقه ماكانش مظبوط واتقبض عليه واترحل، وبعدها قالي إنه واحد صاحبه جاب له شغل في إسكندرية في شركة مقاولات ومرتبها كويس والإقامة تبع الشركة، كل ده وأنا ماشكتش في أي حاجة، وكنت كل ما أطلب منه فلوس يقولي اصبري عليّ شوية".   وتابعت صاحبة الـ31 عاما حديثها، أنه بدأ يتغير في معاملتها وكثرت الخلافات بينهما، فتركها هي وطفلتيها أكثر من شهرين، وتدخل شقيقه في الموضوع لمحاولة حل المشكلة وإنهاء الأزمة: "بعد ما أخوه صالحنا على بعض بقى يجي البيت كل أسبوعين يوم ويمشي، وطول الوقت عصبي وماحدش عارف يكلمه، وأنا كنت باعدي وأقول من قلة الفلوس معاه وضغط الشغل، وفي الإجازة دي كان عمل حادثة بالموتوسيكل وطبعا مسافرش، بعد ما رجع البيت اكتشفت إن معاه موبايل تاني أنا معرفش عنه حاجه، قلبت في الموبايل لقيت كل الرسايل والمكالمات اللي عليه من رقم واحد بس، وكانت أخر رساله من ربع ساعة وبتقوله فيها هترجع إمتي عشان أنا خايفة من الشقة ومش عارفة أقعد لوحدي"   صدمت بسمة عند اكتشافها الأمر، وواجهت زوجها في وجود شقيقه الأكبر: "قالي بكل بجاحة أيوة أنا متجوز وبحبها مش عاجبك اطلقي، وسابلي البيت ومارضيش يطلقني"، لترفع عليه قضية خلع تنظر أمام محكمة مصر الجديدة.