مصطفى درويش يكشف أنّ قصة مسلسل "إلا أنا" أدخلت الشك في قلوب النساء

تحدث الفنان المصري مصطفى درويش، عن دوره في مسلسل "إلا أنا"، حيث يتقاسم دور البطولة في القصة التي تعرض خلال الفترة الحالية، مع النجمة ريهام عبد الغفور.وتفاعل الجمهور مع قصة ريهام عبد الغفور ومصطفى درويش التي تمتد على مدار 10 حلقات، من مسلسل "إلا أنا"، حيث تلعب الأولى دور الزوجة، بينما يقوم الأخير بالزواج عليها.

وقال مصطفى: "إن القصة أدخلت الشك في قلوب ستات كتير، ومعظمهم بقى يفتش في موبايلات الزوج، بس أنا عاوز ياخدوا العظة من جانب تاني".وأضاف: "الراجل في القصة دي أنا شايفه مش غلطان، هو غلط بس في إنه اتصرف غلط، ولكن قرار الزواج مكنش غلط".وتابع: "أنا في الحقيقة متجوزتش أصلا لسة، بس الشخصية اللي لعبتها ده راح اتجوز، وده حلال، هل لو عمل علاقة غير مشروعة من غير جواز ده غلط ولا لو اتجوز غلط؟!".

وأردف: "أكيد العلاقة غير المشروعة هي الغلط، وشخصية أحمد طول المسلسل عمال بيجري ورا ريهام (زوجته الأولى)، وبيطلب منها ترجعله، حتى لما بهدلها وقطع عنها المصروف كان الهدف إنها ترجعله، ولما راحت المعرض اللي هو بيشتغل فيه، هو هدي شوية، لإنه كان واخد الموضوع عِند بس".

وأكمل: "المفروض الست تحابي على جوزها وعيالها، هو الراجل اتاخد منها، الطبيعي إنها ترجعه تاني مش في أول موقف تسيبه وتبعد عنه رغم إنه عمل بالحلال".وعن تجربة إصابته بفيروس كورونا، التي مر بها منذ شهرين تقريبا، قال مصطفى: "أنا مبخافش، بس هي نفسيا كانت تجربة صعبة جدًا، ولكن أنا بتاع ربنا في الحاجات دي".

وعن إصابة أكثر من فنان وفنانة في مهرجان الجونة بفيروس كورونا، قال درويش: "أنا كنت في الجونة برده بس الحمدلله، كلهم إخواتي واللي هيحصلهم هيزعلني، أكيد بزعل عليهم زي ما بزعل على نفسي".وعن تجربة مسلسل "بـ100 وش" الذي عرض في رمضان الماضي وحقق نجاحًا كبيرًا، قال: "ده أحلى عمل عملته في حياتي، مع نيللي كريم وآسر ياسين، هما الاتنين جمال جدا".واختتم: "عندنا فيلم بـ100 وش، هنقدمه قريب إن شاء الله، سلسلة أفلام مش فيلم واحد، وبإذن الله ربنا يكرمنا ونحقق النجاح".

قد يهمك أيضا :  

مصطفي درويش يعلن عن إصابته بـ"كورونا" عبر حسابه على "فيسبوك"

الفنان مصطفى درويش يغلق حسابه على «تيك توك»