حنان مطاوع تنتقد بكاء الفنانين في البرامج

خلال لقائها مع الإعلامية فاطمة مصطفى في برنامج "الراديو بيضحك" المذاع عبر الراديو 9090، علّقت الفنانة حنان مطاوع على لقب "النجمة الملتزمة"، كما انتقدت بكاء النجوم في البرامج التلفزيونية، موضحةً أنها لا تفضّل الحديث عن الجانب الشخصي في البرامج، وكاشفةً عن علاقة الصداقة المميزة التي تجمعها بالفنانة ريهام عبد الغفور.

وقالت حنان عن لقب "النجمة الملتزمة": "مقولتش إني فخورة بلقب النجمة الملتزمة، طبعاً متشكرة على اللقب ولكني مش عايزة ألقاب أنا عايزاهم يفتكروني بالخير وخلاص، وطبيعي كلنا ملتزمين وأتمنى لما حد يلحق بي لقب يكون مرتبط بفني زي الشاطرة أو الموهوبة، تبقى حاجة مرتبطة بأدائي مش شخصي، وأعتقد إني ممكن أبقى متحررة في وجهة نظر البعض وملتزمة في وجهة نظر البعض الآخر".

أما عن بكاء النجوم في البرامج التلفزيونية فقالت حنان: "أنا مش فاهمة ليه الواحد يروح برنامج عشان يجرّح في حد سواء عايش أو متوفي، أو حد يروح برنامج علشان يعيّط، أو حد يبتزني عاطفياً، الناس فيها اللي مكفيها وكلنا عندنا أوجاعنا وأمراضنا، ومن وجهة نظري فلنقل خيراً أو لنصمت".

وعن مشاركتها في موسم رمضان المقبل، من خلال مسلسل "حياة أو موت"، قالت مطاوع: "مسلسل "حياة أو موت" سكربت صعب وشخصية صعبة، أول مرة أطلع عمياء ومش كل المسلسل".

وعن علاقتها بريهام عبد الغفور فعلّقت حنان قائلةً: "ريهام أختي وصاحبتي وفنانة عظيمة، ودايماً مستشارتي في أي حاجة بتحصل وبتقولي أتصرف إزاي، وبتمنى ليها كل خير ويا رب المسلسل بتاعها السنة دي في رمضان يكسّر الدنيا، هي محتاجة الدعم لأنها مرّت بسنة صعبة".

كما كشفت حنان مطاوع عن حبها الكبير للقراءة، قائلةً: "علاقتي بالكتاب نورتلي حاجات كتير أوي في حياتي، وتحويشة عمري بتروح على الكتب في معرض الكتاب، وقرأت في الشريعة والتاريخ والفلسفة على حسب المرحلة العمرية اللي كنت بمر بيها، وأنا مكنتش بشتري حاجات زي البنات والشباب وكنت بشتري كتب... إنك تتلقى معلومة من كتاب غير لما تتلقيها من موبايل، الموبايل عاطفي وموجّه ومش عارفة مصدر المعلومة منين، ولكن الكتاب حالة من الخيال جوا اليقين والوعي".

قـــد يهمــــــــك أيضــــــاُ : 

حنان مطاوع تكشف أسرار عن والدها الراحل كرم مطاوع لأول مرة

حنان مطاوع تشيد بموهبة مها نصار والأخيرة ترد